ವ್ಯಾಲೆಂಟೈನ್ಸ್ ಡೇ ಪ್ರಯುಕ್ತ ಪ್ರೇಯಸಿಯೊಂದಿಗೆ ಶಾಪಿಂಗ್ ಮಾಲ್ಗೆ ಬಂದಿದ್ದ ಪತಿಯನ್ನ ಪತ್ನಿ ರೆಡ್ ಹ್ಯಾಂಡ್ ಆಗಿ ಹಿಡಿದಿದ್ದಾಳೆ. ಈ ಘಟನೆಯಲ್ಲಿ, ಪತ್ನಿಯ ಆಕ್ರೋಶಕ್ಕೆ ಹೆದರಿದ ಪತಿರಾಯ, ಪ್ರೇಯಸಿಯನ್ನು ಅಲ್ಲೇ ಬಿಟ್ಟು ಓಡಿಹೋಗಿದ್ದಾನೆ. ಈ ದೃಶ್ಯ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.
ಉತ್ತರ ಪ್ರದೇಶದ ಜನನಿಬಿಡ ಶಾಪಿಂಗ್ ಮಾಲ್ ಒಂದಕ್ಕೆ ವ್ಯಾಲೆಂಟೈನ್ಸ್ ಡೇ ಪ್ರಯುಕ್ತವಾಗಿ ಜನರು ಸಾಗರೋಪಾದಿಯಲ್ಲಿ ಹರಿದುಬಂದಿದ್ದರು. ಈ ಸಂದರ್ಭದಲ್ಲಿ ಮಹಿಳೆಯೊಬ್ಬರು ತಮ್ಮ ವೈಯಕ್ತಿಕ ಶಾಪಿಂಗ್ಗಾಗಿ ಮಾಲ್ಗೆ ಬಂದಿದ್ದರು. ಅದೇ ಸಮಯದಲ್ಲಿ ಅವರ ಪತಿ ಕೂಡ ಮತ್ತೊಬ್ಬ ಮಹಿಳೆಯೊಂದಿಗೆ ಮಾಲ್ನಲ್ಲಿ ಓಡಾಡುತ್ತಿದ್ದರು. ಮೊದಮೊದಲು ದೂರದಿಂದಲೇ ತನ್ನ ಪತಿಯನ್ನು ಹೋಲುವ ವ್ಯಕ್ತಿಯನ್ನು ನೋಡಿ ಅನುಮಾನಗೊಂಡ ಪತ್ನಿ, ಹತ್ತಿರ ಹೋಗಿ ನೋಡಿದಾಗ ಆಕೆ ಬೆಚ್ಚಿಬಿದ್ದಿದ್ದಾರೆ. ಸಾಕ್ಷಾತ್ ತನ್ನ ಪತಿಯೇ ಬೇರೊಬ್ಬ ಯುವತಿಯ ಜೊತೆಗೆ ಕೈ ಕೈ ಹಿಡಿದು ಪ್ರೇಮಿಗಳ ದಿನದ ಸಂಭ್ರಮದಲ್ಲಿದ್ದರು!
ಪತಿಯ ಲೀಲೆ ಕಂಡು ಕೆಂಡಾಮಂಡಲವಾದ ಪತ್ನಿ, ಕೂಡಲೇ ಅಲ್ಲಿಗೆ ತೆರಳಿ ಪತಿಯನ್ನು ತರಾಟೆಗೆ ತೆಗೆದುಕೊಂಡಿದ್ದಾರೆ. ಪ್ರೇಯಸಿ ಎದುರೇ ಪತ್ನಿ ಗದ್ದಲ ಆರಂಭಿಸುತ್ತಿದ್ದಂತೆ ಮಾಲ್ನಲ್ಲಿದ್ದ ನೂರಾರು ಗ್ರಾಹಕರು ಇತ್ತ ಕಡೆ ತಿರುಗಿ ನೋಡಿದ್ದಾರೆ. ಇಬ್ಬರ ನಡುವೆ ಜೋರಾದ ವಾಗ್ವಾದ ನಡೆದಿದ್ದು, ಪತ್ನಿಯ ಆಕ್ರೋಶ ಕಂಡು ಪ್ರೇಯಸಿ ಕೂಡ ದಂಗಾಗಿದ್ದಾರೆ. ಈ ದೃಶ್ಯ ಮಾಲ್ನ ಸಿಸಿಟಿವಿ ಮತ್ತು ಜನರ ಮೊಬೈಲ್ಗಳಲ್ಲಿ ಸೆರೆಯಾಗಿದೆ.
ಪತ್ನಿಯ ಆರ್ಭಟ ಜೋರಾಗುತ್ತಿದ್ದಂತೆ ಹಾಗೂ ಸಾರ್ವಜನಿಕವಾಗಿ ಮಾನ ಹರಾಜಾಗುತ್ತಿದೆ ಎಂದು ಅರಿತ ಪತಿರಾಯ, ಅಲ್ಲಿಂದ ತಪ್ಪಿಸಿಕೊಳ್ಳಲು ಹರಸಾಹಸ ಪಟ್ಟಿದ್ದಾನೆ. ಪತ್ನಿಯ ಪ್ರಶ್ನೆಗಳಿಗೆ ಉತ್ತರಿಸಲಾಗದೆ, ಅಂತಿಮವಾಗಿ ಪ್ರೇಯಸಿಯನ್ನು ಬಿಟ್ಟು ಮಾಲ್ನಿಂದ ಹೊರಕ್ಕೆ ದಿಕ್ಕಾಪಾಲಾಗಿ ಓಡಿ ತಪ್ಪಿಸಿಕೊಂಡಿದ್ದಾನೆ. ಪರಿಸ್ಥಿತಿ ವಿಕೋಪಕ್ಕೆ ಹೋಗುತ್ತಿರುವುದನ್ನು ಗಮನಿಸಿದ ಮಾಲ್ನ ಭದ್ರತಾ ಸಿಬ್ಬಂದಿಗಳು ಕೂಡಲೇ ಮಧ್ಯಪ್ರವೇಶಿಸಿ, ಪರಿಸ್ಥಿತಿಯನ್ನು ತಿಳಿಗೊಳಿಸಿದರು ಮತ್ತು ಗಲಾಟೆಯಿಂದ ಇತರ ಗ್ರಾಹಕರಿಗೆ ತೊಂದರೆಯಾಗದಂತೆ ನೋಡಿಕೊಂಡರು.
